“Məni bir müxalifət lideri satdı” – Eynulla Fətullayevdən sensasion açıqlamalar

“Məni bir müxalifət lideri satdı” – Eynulla Fətullayevdən sensasion açıqlamalar

MTN olayları, Akif Çovdarovun davam edən məhkəməsi, Amerika seçkiləri. Gündəm yenə yetərincə qaynardır. Hər zaman eksklüziv məlumatları və səs-küy doğuran açıqlamaları ilə fərqlənən baş redaktor Eynulla Fətullayevi redaksiyamıza dəvət edib, söhbətləşdik. “Yeni Müsavat”  qəzetinin baş redaktoru Rauf Arifoğlu, baş redaktorun müavini Azər Ayxan, baş direktorumuz Ələsgər Süleymanov, yazarlar Həmid Herisçi və Sevinc Telmanqızının iştirakı ilə qonağımızı sorğu-suala çəkdik.  Hamımız “xəbər dənizi”nin içində üzsək də, qonağımızın bir çox mövzularla bağlı fərqli informasiyaları söhbət zamanı üzə çıxdı. 

Amma təəssüf ki, söhbəti qanqaraldıcı bir mövzu, Eynulla Fətullayevin bu yaxınlarda baş vermiş ata itkisi ilə başlamaq zorunda qaldıq. 

R.Arifoğlu: 

– Bir müddət öncə atanız Emin Fətullayevi, atanızı, bir dostunuzu itirdiz… O, həm də bizim dostumuz idi. Siz həbsdə olanda biz onunla çox dostlaşmışdıq. Atanız haqda bir neçə kəlmə deyə bilərsizmi? Onun itkisi, onun sizin həyatınızdakı rolu, yeri… 

  • Mən düşünürdüm ki, həyatda ən ağır sınaqlardan çıxmışam və məni daha heç bir faciə, itki sarsıda bilməz. Sanki bütün əsas sınaqlar arxada qalmışdı. Amma inanmazdım ki, ata itkisi bu qədər ağır və sarsıdıcı olar. Çünki mən həm atamı, həm də dostumu itirmişəm. Bunu dəfn günü də dostlara dedim… Atam mənimlə uşaqlıqdan münasibətlər sistemini elə qurmuşdu ki, biz onunla dost kimi hər şeydən danışa bilirdik. Bizimçün qapalı mövzu yox idi həyatda. Həqiqətən də mənimçün böyük mənəvi dayaq, arxa idi. Onun ölümündən sonra çox böyük boşluq hiss etdim. Bu boşluğu doldura bilmirəm və əminəm ki, heç vaxt doldura bilməyəcəm.

S.Telmanqızı: 

– Hazır deyildiz bu itkiyə? Qəfilmi oldu? Xəstəlik, ya..? 

  • Qəfil xəstəlik idi. Xərçəngdən dünyasını dəyişdi. Üç həftə ərzində biz onu itirdik. Şiş beyninin nəfəs mərkəzi və ürəyə cavab verən hissəsində idi. Türkiyədə əməliyyat elətdirdik. Amma sona qədər xəstəliyini ondan gizlətmişdik. O, çox mübariz insan idi. İstəmirdim ki, depressiyaya qapılsın. Hətta mən bir dəfə ona dedim ki, papa, narahat olma, mən sona qədər səninləyəm. Soruşdu ki, sona qədər… Ölümündən üç-dörd gün qabaq idi. Nəysə, həyatdı, Allahın hökmüdür.

S.Telmanqızı: 

– Sizə son sözü nə oldu?

R.Arifoğlu: 

– Halallaşma imkanı oldumu? 

  • Təbii oldu… Ümumiyyətlə, ondan öncə də səmimi söhbətlərimiz olurdu, müzakirələr edirdik. Nədəsə razı idi, nədəsə razı deyildi. Mən onunla dost idik, açıq müzakirələr aparırdıq.

R.Arifoğlu: 

– Bayaq dediz ki, mən çox əziyyətlər çəkmişəm, çox sınaqlardan keçmişəm. Elə vaxt olub ki, sizin əldə etdiyiniz, qurduğunuz hər şeyi sıfırlayıblar. Siz həbsə gedib – gəlib, hər şeyi yenidən, sıfırdan başlamısız… Yeni başladığınız bu proses, qurduğunuz media resursları, onların vəziyyəti hazırda nə yerdədir? Siz əsasən rusdilli oxuculara xitab edirsiz. O məkanda da informasiya müharibəsi gedir. Azərbaycan informasiya resursu olaraq o, informasiya müharibəsi göstəricilərinə cavab verirmi? 

“Həmin an yüksək rütbəli dövlət məmurunun kabinetində Cəmil Həsənlinin gözündən yaş gəlmişdi”
  • Əfsanəvi sovet aktyoru Rolan Bıkovun gözəl bir sözü var: “Mən yıxıldım, ayağa qalxıb yolu yenidən davam edəcəm”.  2007-ci ildə ümummilli resurslarımız var idi. Bir günün içində hər şey dağıldı. Daha sonra yenidən hər şeyə sıfırdan başlamalı oldum… Mən hər səhər oyananda, ilk hissim o olur ki, özümdən və öz işimdən narazıyam… Nə zamansa, günə oyananda özümdən və işimdən razı olsam, o zaman artıq uğrunda mübarizə aparacaq zirvə olmayacaq.

R.Arifoğlu: 

– Çox fəlsəfəsi yanaşma olmadımı? Bu, bir menecer yanaşmasından çox uzaqdır axı…

  • Xeyr, mən özümdən çox narazıyam. Həmişə axtarışlardayam. Dünya mediasına hər gün baxıb, müqayisələr aparır, özümü qeyri-mükəmməl hiss edirəm, mükəmməl olmaq üçün çalışıram. Hesab edirəm ki, uğurun formulu budur. O insan ki, düşünür ki, həyatda hər şeyə nail olub və əldə edib, artıq yeni uğur qazanmaq üçün şansı yoxdur, demək, resurslar bitib. Amma hazırda haqqin.az saytına hər gün 500 minə yaxın ziyarətçi daxil olur. Məni sevindirən odur ki, istifadəçilərin 65 faizi Azərbaycandan daxil olursa, təxminən 35 faizi xaricdəndir. Rusiyada, Ermənistanda, Ukraynada bizi çox oxuyurlar. Bir də Qərb ölkələrində ekspert heyəti çox oxuyur. Bəzən saytımıza Küveytdən, Mərakeşdən daxil olurlar. Bəzi ölkələrdə bizim sayta giriş qadağan olunub. Məsələn, Özbəkistanda bizim sayta girişi bağlayıblar. Bu da İslam Kərimovun qızı Gülnarə Kərimova barədə bizim saytda ilk xəbər gedəndən sonra olub. Gülnarə Kərimova həbs olunanda bu barədə ilk məlumatı biz yazmışdıq. Çünki mən tvitterdə onun izləyicisi idim. 3 il bundan öncə onun həbsini yazandan sonra bizi Özbəkistanda blokladılar. Qazaxıstanda da, eynilə prezidentin qızından yazandan sonra bizi blokladılar…

R.Arifoğlu:

– Yəni türmə fasiləsindən sonra qurduğunuz media resursları artıq oxunur, müzakirə olunur, hətta o qədər təsirlidir ki, bəzən cəzalandırılır… 

  • Oxunur təbii ki. İnsan barədə ən yaxşı qiyməti onun tənqidçisi və bədxahı verir. Gültəkin Hacıbəyli özü etiraf etdi… Amma bir şeydə haqsız idi – izlənmə məsələsində. Çünki izlənmə statistikası var, bunu internetdə çox asanlıqla müəyyən etmək olur. Ümumiyyətlə, mən Azərbaycan dilində internet resursu anlayışını qəbul edə bilmirəm. Çünki internet özü qlobaldır, buna deyirlər qlobal hörümçək. İnternet resursu iki dildə effektli ola bilər – rus və ingilis dillərində…

R.Arifoğlu:

– Bəs daxili auditoriya? Onun informasiya tələbatı? 

  • Mən sizinlə razıyam. Artıq dünyada siyasi konyektur və siyasi trendlər elə qlobal xarakter alıb ki… Bizim saytda Trampın prezident seçilməsi xəbəri partlayış yaratdı. Heç bir Azərbaycan xəbərinin oxunma statistikası onu üstələyə bilmədi.  O xəbər qısa zamanda 23 min İP gətirdi idi.

R.Arifoğlu: 

– Yeri gəlmişkən, mən Amerikadakı seçki günü bir köşə yazdım – 30 minə yaxın adam oxudu.  Halbuki cəmi 15 dəqiqə ərzində yazdığım ilkin müşahidələrim idi…

E.Fətullayev:

  • Rauf bəy, gəlin ona baxaq ki, 20 il bundan öncə Amerika, Fransa seçkiləri barədə xəbərlər Azərbaycanda bu qədər maraqla qarşılanırdımı? Əsla.

R.Arifoğlu: 

– Yəni deyirsiz ki, bu vəziyyət Azərbaycan üçün yeni standartlar yaradır? 

  • Nəinki Azərbaycan, ümumiyyətlə, bütün dünya üçün. Ona görə də bu gün dünya internet şəbəkəsi BMT-nin 5 dilindən ibarətdir. Onun ən vacib seqmenti rus dilidir. Biz kiminlə rəqabət apara bilərik? Bizim əsas bazar rusdilli oxuculara xitab edən auditoriyadır. Məsələn, bizim sayt Ukraynanın əksər saytlarından çox oxunur.

S.Telmanqızı: 

“Adını deməyəcəyim bir müavini dedi ki, Əli Kərimli 2013-cü ildə Cəmil Həsənli vasitəsilə hakimiyyətə bir ziyalı silləsi vurdu”

– İndi siz nə təklif edirsiz? Milli internet resursları öz fəaliyyətini dayandırsın və… 

  • Yox, azərbaycandilli saytlar lazımdır. Amma mən ona görə deyirəm ki, üstünlüyü rus dilinə vermişik. Əsas platforma rus dilindədir. Çünki internetdə sərhəd yoxdur. Bu, daha çox oxucu gətirir.

R.Arifoğlu: 

– Eynulla bəy, bayaq təpkilərdən danışdız. Milli Şura ilə bağlı da nəsə gərginlik var. Niyə sizi zaman-zaman hədəfə gətirirlər? Bunun səbəbi nədir? 

  • Məni hər zaman bu sual maraqlandırır. Biz sizinlə 20 ildir ki, tanışıq. Siz hər zaman proseslərin mərkəzində olmusuz. Mən də mərkəzdə olmasam da, yaxınında olmuşam. Mən hər zaman jurnalist fəaliyyəti ilə məşğul olmuşam. Dövlət işini çıxmaq şərtilə – 2-3 il nazir müşaviri olmuşam – hər zaman jurnalistika ilə məşğul olmuşam…

R.Arifoğlu: 

– Türmə dönəmini çıxmaq şərtilə, neçə il fasiləsiz jurnalistika ilə məşğul olmusuz? 

  • İlk yazılarımı 1992-ci ildə “İstiqlal” qəzetinə yazırdım… Demək istəyirəm ki, mən heç zaman milli demokratik düşərgə adlanan məkanda olmamışam. Biz “Monitor”da çox ciddi, sərt tənqidlər yazmışıq hökumətlə bağlı. Amma eyni zamanda müxalifətlə bağlı da kəskin yazmışıq. “Gündəlik Azərbaycan”da da həmçinin. Amma gəlin 2006-cı ildəki ittihamları yada salaq. Onda deyirdilər ki, Eynulla Fətullayev hakimiyyətə işləyir.

S.Telmanqızı: 

– Cəmil Həsənlinin ittihamında da sizin “hökumətin adamı” olmanız yer alır. O deyir ki, zamanında sizi Milli Məclisdə müdafiə edəndə hökumət deputatları ona “Eynulla bizim adamımızdır, qaydaları pozub, cəzasını çəkir, çıxandan sonra yenə bizim adamımız olacaq”, deyibmiş… 

  • Eynulla heç kimin adamı ola bilməz. Jurnalistlər iki hissəyə bölünə bilər: canavarlar və gözətçi köpəklər. Rauf bəy haqda heç kim “bizim adamdır” deyə bilməz. Çünki Rauf bəy peşəkar jurnalistdir. Mənim haqqımda da heç kim bu sözü işlədə bilməz.  Cəmil Həsənlinin məntiqini başa düşmürəm. Deyir ki, biz onu zamanında müdafiə etmişik. Niyə müdafiə etmisiz? Çünki haqlarım pozulub,  qanunsuz həbs olunmuşam…

R.Arifoğlu: 

– Bu minnət diqtə edir ki, siz ömür boyu sizi müdafiə etmiş adama borclu olasız… 

  • Bu, alim təfəkkürü deyil.

S.Telmanqızı: 

– Amma birinci daş sizin tərəfinizdən atılmışdı… 

  • Xeyr. Tramp prezident seçiləndən və Türkiyədəki məlum həbslər, respressiyalar başlayandan sonra  mən yazdım ki, dünyada və regionda yeni situasiya yaranıb, bu situasiyada siz İlham Əliyevin diktator olduğunu deyirsiz.  İlham Əliyev diktatordursa, onda Cəmil Həsənli ilə Əli Kərimli şəhərin mərkəzində, Milli Məclisin on addımlığında, mərkəzi meydanlardan birində çıxıb tərəfdarları ilə birgə necə şüarlar səsləndirir? Axı diktatura belə olmur.  Azərbaycanda diktatura olsaydı, Cəmil Həsənli ilə Əli Kərimlini o stadiona yığıb güllələyərdilər. Diktator güllələyir. Diktator stadion verir ki, mitinq keçirsinlər?

R.Arifoğlu: 

– Mənə maraqlı gələn nədir, bilirsiz? Onları tənqid, hətta təhqir edən çox adam var. Amma məhz sizə çox həvəslə reaksiya verirlər, mübahisəni siz başlasaz da özləri davam etdirməkdə maraqlıdırlar. Nəyə görə sizin sözlərinizə bu cinahda bu qədər həssasiyyət var? 

  • Eyni şeyləri mən də sizin haqqınızda deyə bilərəm. (gülür)

R.Arifoğlu: 

– (İroniya ilə) Məni çox istəyirlər. 

E.Fətullayev:

  • Söhbət ictimai rəyə təsir imkanlarından gedir.

S.Telmanqızı: 

– Bu cür dartışmalarla siyasi reytinqin artırılması, gündəmdə qalmaq cəhdini nəzərdə tutursuz? 

  • Deyək ki, biz bir analitik məqalə yazırıq. Onlar görür ki, burda məntiq, həqiqət var. Narahat olurlar. Ona görə də bu qədər emosional şəkildə cavab verirlər.

R.Arifoğlu: 

– Çox ağır cavablar yazırlar. Məsələn, bir jurnalist nəsə yazıb, onu qıcıqlandıra bilər. Bu, jurnalistin işidir. Amma bir siyasi liderin bu qədər çirkli ifadələrdən istifadə etməsinə necə baxırsız? 

  • Cəmil müəllim alimdir, tarixçidir. Mən bir dəfə onun kitabını oxumaq istədim, 20 səhifədən artıq oxuya bilmədim…

R.Arifoğlu: 

– Mən heç oxumamışam. Amma Pənah Hüseyn deyir ki, çox yaxşı alimdir. 

  • Alim kimi yaxşı ola bilər. Amma maraqsız yazır. Konseliarikdir də. Söhbət üslubdan gedir. Tarixi təsvir etməkdən gedir.

S.Telmanqızı: 

– O da sizi plagiatlıqda ittiham edir. Nərimanov haqda yazdığınız kitabın köçürülmə olduğunu, sizin də bunu etiraf etdiyinizi deyir… 

  • Kitabdan söz getmir… Mən 2-ci kursda oxuyanda yazdığım essedən danışır… O zaman Cəmil Həsənli kommunist idi. Fəxrlə yazır ki, mən Lenin kitabxanasında araşdırma aparanda Eynulla uşaq olub… Mən bir gün belə komsomol olmamışam. Kommunist Partiyasının üzvü də olmamışam. Amma bu keçmiş kommunistlər bir günün içində gəlib milli demokrat oldular. Dünənə qədər Nərimanovu təbliğ edib, onun kultunu yaradanlar onu təhqir etməyə başladılar. Mən özümdə bunlara cavab vermək ehtiyacı hiss etdim. Dözə bilmədim. Nərimanov mənim ikinci kursda kurs işim olub. Bu adam bir tələbənin kurs işini təhlil edir, Rauf bəy…
“Mən düşünürdüm ki, həyatda ən ağır sınaqlardan çıxmışam və məni daha sarsıdıcı, faciəvi bir hadisə gözləmir”

R.Arifoğlu: 

– Cəmil Həsənli bir tələbənin diplom işini necə tapıb, necə məlumatlıdır?

  • Mənim yazım o zaman böyük əks-səda verdi. Mən yazdım ki, mən bir tələbə olaraq bunları yazmışam. Siz kommunist olmusuz, bu ideyaları satmısız. Sonra gəlib milli demokrat olmusuz, o ideyaları da satmısız. İndi də oldular neokomminist. Əli Kərimli də, Cəmil Həsənli də. Sonra milli demokrata çevrildilər. Metamarfoz yenidən baş verə bilər. Mən də cavab verdim, 17 yaşımda.

S.Telmanqızı: 

– Cəmil Həsənli isə deyir ki, siz zamanında bu plagiatlığınıza görə üzr istəyib, hönkür-hönkür ağlamısız… 

  • Bu bilirsiz nəyə cavab verir? Mən yazmışam ki, niyə Cəmil Həsənli müxalifətçi olub? Axı Cəmil Həsənli Misir Mərdanovu tərifləyirdi, Fərhad Əliyevin kabinetindən çıxmırdı, Zağulbada ikinci hökumət bağında qalırdı. YAP nomenklaturasının içindən çıxmayan adam idi. 2004-2010-a qədər onun çevrəsi belə idi. Prezident Administrasiyasından xüsusi olaraq xahiş edirdi ki, onu ikinci hökumət bağına göndərsinlər. Çünki bilirdi ki, YAP nomenklaturası ora toplaşır, orda xüsusi xahişlər etmək olur, şəxsi kontaktlar əldə edilir… Cəmil Həsənli praqmatik insandır, siyasi romantikadan uzaqdır… 2010-cu ildə onu çağırıb deyirlər ki, cənab prezident sənə ev verdi, bütün şəraitlər yaradıldı, yaşlı adamsan, sənin növbən bitdi. İndi Rasim Musabəyovun növbəsidir… Həmin an yüksək rütbəli dövlət məmurunun kabinetində Cəmil Həsənlinin gözündən yaş gəlmişdi. Mən bunu yazdım, Cəmil Həsənli də mənə cavab olaraq o ağlamaq söhbətini yazdı.

S.Telmanqızı: 

– O zaman da sual qoyulur ki,  bu qədər gizli məlumat sizdə hardandır? Sizə bu gizli səs yazıları ötürülür? 

  • Azərbaycan balaca ölkədir. Burada bir insan haqda hansısa bir informasiya, hadisə, rəy daha tez yayılır. Hamı hamını tanıyır. Bilirik ki, hansı proseslər baş verir. Əli Kərimlinin adını deməyəcəyim bir müavini dedi ki, Əli Kərimli 2013-cü ildə Cəmil Həsənli vasitəsilə hakimiyyətə bir ziyalı silləsi vurdu. Bu, faciədir. Cəmil Həsənli Əli Kərimli kimi bir siyasi aferistin siyasi mübarizəsində vasitə rolunda çıxış etdi.

R.Arifoğlu: 

– Amma deyirsiz ki, Cəmil Həsənli praqmatikdir. Bu cür siyasi praqmatiki nə vadar etdi ki, bu çevrəyə özünü salsın? 

  • İddia. Bizim siyasi isteblişmentin digər bir bəlası iddiadır. Odur, Gültəkin Hacıbəylidir, hər ikisində aşırı iddia var.

R.Arifoğlu: 

– Gültəkin Hacıbəylinin mövqeyi də çox maraqlıdır. Hakimiyyət düşərgəsindən o qədər imkanları buraxdı və keçdi Əli Kərimlinin yanına… 

  • Mən Gültəkin Hacıbəylini YAP-da olanda görmüşəm və onunla çox söhbətlərimiz olub. Onun ədaları, özünü aparması, mimikaları… Birdən-birə adam yüz faiz dəyişir və sənin qarşında Roza Lüksemburq yaranır. Bir gün sən Gültəkin Hacıbəyli simasında partokrat Lüdmila Furtsevanı görürsən, o biri gün isə Rozaya çevrilir. Mən onu fanatik yapçı kimi tanıyırdım…

R.Arifoğlu: 

– Amma çox da cəsurdur. Bir çox kişilərin qorxduğu tənqid və fikirləri deyir, siyasi “tormoz”u yoxdur, sanki. Amma ona dəymirlər. Toxunulmazlığı var sanki… 

  • Toxunulmazlıq deyil bu. Sadəcə, elə adamlar var ki, onlar adi insan həyatı yaşaya bilmir. Bu, həm şöhrətpərəstlikdir, həm də komplekslərin girovuna çevrilməkdir.

R.Arifoğlu:

– Eynulla bəy, mümkünsə müxalifət düşərgəsindən çıxaq. Bayaq həbsinizlə bağlı danışdız, üstündən keçdik… Siz dəfələrlə demisiz ki, məni Çovdarov-Mahmudov mafiyası həbs etdirib. Sonradan məlum oldu ki, bunlar dövlətdə çox mühüm bir postu, sahəni ələ keçiriblər və istədiklərini ediblər. Və bu prosesin içində zərərçəkmiş kimi tanınmış jurnalist Eynulla Fətullayev də olub. Siz niyə onlardan rəsmən şikayət etmirsiz? Bəlkə etmisiz, bizim xəbərimiz yoxdur? Sizin onlarla yollarınız niyə toqquşdu? Bu toqquşmada Elmar Hüseynov faktorunun nə dərəcədə rolu var? 

  • Akif Çovdarov adını 2007-ci ilin mart ayına qədər eşitməmişəm. Çovdarov mənim eşitdiyim ilk azərbaycanlı soyadı idi. O zaman bir nəfər bunun adını həbsxanada çəkmişdi (Mən onunla gedib həbsxanada görüşmüşdüm). Mən Elmar Hüseynovun qətlinin izi ilə gedirdim. Əslində başqa bir adamın izi ilə gedirdim. Amma mənə dedilər ki, yox, yanlış izdəsən. Orda yeni Hacı Məmmədov var, onun da adı Akif Çovdarovdur…

Telmanqızı: 

– Bəs sonra? 

  • Ondan sonra məni bir müxalifət lideri satdı. Mən bu müxalifət liderinə zəng etdim, çünki onun məlumatlı, informasiyalı olduğunu bilirdim… Ondan görüş istədim, bulvarda çay içdik. Ona dedim ki, MTN-də Çovdarov deyə biri var, onunla bağlı məlumatlısızmı? Amma bu adamla danışanda mən bilməmişəm ki, onun keçmiş MTN rəhbərliyi ilə əlaqəsi var. Demək, bu adam mənlə görüşəndən sonra dərhal gedib MTN rəhbərliyinin yanına. Onlara deyib ki, Eynulla Fətullayev mənimlə görüşdü və Akif Çovdarovla maraqlandı. Bunlar da şübhələniblər. Çünki Akif Çovdarov o zaman qapalı isim idi.

R.Arifoğlu: 

– O zaman MTN-dəki məlum vəzifəsində idi? 

  • Bəli, yenicə düzəlmişdi.

S.Telmanqızı: 

– Hələ Aqil Xəlil döyülməmişdi? 

  • Yox, Aqilin döyülməsinə var idi hələ. Məndə olan məlumata görə, həmin vaxt mənim telefonumu yoxlamağa başlayıblar – şəbəkə içində harada olmağım araşdırılıb. O zaman görmüşdülər ki, mən harasa girib, kimləsə görüşmüşdüm. Tiflisdəki Teymuraz Əliyevlə (Elmar Hüseynovun qətlində adı hallandırılan şəxs-S.T.) görüşdən sonra da məni MTN-ə çağırıb, görüşdülər. Xəbərdarlıq da etdilər ki, bu məsələlərə müdaxilə etmə. …Akif Çovdarovla ən maraqlı söhbətlərimiz həbsxanada olub. Mən bu barədə məhkəmələrimdə də danışmışam. Amma indi mövzu aktualdır deyə, yaddaşı təzələmək lazımdır. Mən kamerada idim, gəlib xəbər verdilər ki, rəisin otağında bir nəfər səni gözləyir. Getdim gördüm bir nəfər oturub.

Dedi: “Akif Çovdarovu axtarırdın, Akif Çovdarov mənəm, gəl əyləş, söhbətimizi davam edək”.  Soruşdum ki, məni niyə həbs etmisiz? Dedi ki, biz səni burdan elə-belə buraxa bilmərik. Dedim, nə etməliyəm? Dedi, biz səni “verbovka” etməliyik, MTN-in agenti olmalısan. İkincisi, sən Elmar Hüseynovun qətli ilə bağlı ifadə verməlisən. Həmin ifadəndə də deməlisən ki, Elmar Hüseynovun otağında idman çantası görmüsən, o çantanın da içində 300 min avro pul olub. Mən dedim ki, siz nə danışırsız? Axı Elmar rəhmətə getməzdən bir həftə əvvəl evini satlığa qoymuşdu, hətta evin behini də almışdı bir lənkəranlı oğlandan. 300 min avro pulu olan adam da evini satar? Bu, nə məntiqdir? Dedi, sən fikir vermə, mən deyəni de. Müstəntiqlər Sahib Ələkbərovla Sərdar Carçıyevə bu dediklərimi deyərsən. Həm də de ki, Yaqub adlı adamla Elmarın mübahisəsi olmuşdu. Soruşdum ki, Yaqub kimdir? Dedi, samboçu, idmançı olub, onu da 7 ay bundan qabaq öldürüblər. Dedim, axı mən burda hər gün prezidentə məktub yazıram. İndi soruşursuz ki, niyə şikayət etmirsiz? Mən bu adamlardan şikayətimi hamıdan qabaq etmişəm. Daxili İşlər Nazirliyinə, beynəlxalq təşkilatlara, prezidentə, Avropa Məhkəməsinə onlarla bağlı şikayətim var. Mən bu insanlara qatil, cinayətkar demişəm.

R.Arifoğlu: 

– Yəni siz həbsdə olarkən onları Elmar Hüseynovun qətlində açıq-aşkar suçlamısız… 

  • Nəinki o məsələdə.

R.Arifoğlu: 

– Bəlkə səhv edirsiz? Yanılma payı yoxdurmu dediklərinizdə? Dövlət vəzifəsində olan şəxslər bunu niyə etsinlər ki? 

  • Rauf bəy, bu insanlar kadırovçulardır. Təfəkkürləri də elədir. Mən həbsxanada olanda Antiterror İdarəsinin rəhbəri Elçin Quliyev də yanıma gəldi, danışdılar. Mən həbsdə olanda bir-bir qalxırdılar yuxarı (gülür).  Onlarda cinayətkar psixologiyası var.

S.Telmanqızı: 

– Amma yenə də bunlar təxmin səviyyəsindədir də. Siz Tiflisdə Teymuraz Əliyev və onun dostları ilə görüşdüz. Onlarla Çovdarov, eləcə də MTN rəhbərliyi arasındakı bağı, əlaqəni necə qurduz? Konkret sübutlarınız varmı? 

“Akif Çovdarov dedi ki, biz səni “verbovka” etməliyik, MTN-in agenti olmalısan. Elmar Hüseynovun qətli ilə bağlı ifadə verməlisən. Həmin ifadəndə də deməlisən ki, Elmar Hüseynovun otağında idman çantası görmüsən, o çantanın da içində 300 min avro pul olub”
  • Mən bu məsələni lap qoyuram kənara. Mənim atam zərgər idi, 25 il bu sahədə çalışmışdı. Bütün Bakının zərgərləri atamın yaxın çevrəsi idi. Onların hamısını girov aparırdılar. Bir gün atam gəlirdi ki, filankəsi apardılar. Gecəynən başına torba keçirib, aparırdılar MTN-ə. Birindən 300 min, o birindən 500 min, bir başqasından 1 milyon istəyirdilər.

R.Arifoğlu: 

– Eynulla bəy, bu dediyiniz əməllərin hamısını açdılar. Amma Elmar məsələsi ilə bağlı  nə sizin iddialarınızı  rəsmi şəkildə təkzib edən var, nə də bu fraqmenti araşdıranlar… 

  • Jurnalistin vəzifəsi nədir? Jurnalist araşdırma aparır, şübhələrini yəqin edir, onu dilə gətirir. Bununla da bizim missiyamız başa çatır. Biz bilmirik ki, sonrakı proseslər necə davam edir. Mən düşünürəm ki, biz hələ prosesin başlanğıcındayıq.

R.Arifoğlu: 

– Eldar Mahmudov da hələ həbs olunmayıb. 

  • Bəs mən ona görə deyirəm ki, biz hələ proseslərin hansı cərəyanla inkişaf edəcəyini bilmirik. Görünür, bizim hələ bilmədiyimiz çox məqamlar var.

R.Arifoğlu: 

– Cinayətkar qrupla bağlı olan iki nazir var. Bunlardan biri Əli Abbasovdur ki, barəsində bəzi ifadələr var. Digəri isə Eldar Mahmudovdur ki, hələ onun əleyhinə ifadə verilməyib. Bu iki, öz sahəsi üzrə güclü olan iki komanda üzvünün həbsini gözləyirsiz, ya bunlarsız gedəcək proses? Sizin “bu, hələ başlanğıcdır” deyə haqqında danışdığınız proses onlara da sirayət edəcəkmi? 

  • Eldar Mahmudov 10 ildən artıq bir müddətdə Azərbaycanın xüsusi xidmət orqanlarına rəhbərlik edib. Ölkənin ən məlumatlı insanıdır. Ümumiyyətlə, yazılmamış qaydalar, qanunlar var. Xüsusi xidmət orqanı dərin dövlət deməkdir. Və hətta Hitler Almaniyasında hamını həbs etsələr də, Şelinberqi həbs etmədilər. Hamını edam etdilər, Şelinberq və Müller itdilər. Şelinberq, ümumiyyətlə, İsveçrə və İtaliyada yaşayırdı, öz əcəli ilə dünyasını dəyişdi. Mən tarixdə belə presedent görməmişəm ki, xüsusi xidmət orqanlarının rəhbəri həbsxanaya girsin.

R.Arifoğlu: 

– Yəni siz deyirsiz ki, artıq Mahmudov həbsə girməyəcək? O yazılmamış qanunlar onun üçün də tətbiq olunacaqmı? 

  • Çətindir nəsə demək.  Biz yalnız gümanlarımızı bölüşə bilərik. Mənə elə gəlir ki, bütün dövlətlərdə yazılmamış qanunlar var. Şelinberqi həbs etməyiblərsə, Eldar Mahmudovu niyə həbs etsinlər?

S.Telmanqızı: 

– Sizdəki məlumatlar necədir? Eldar Mahmudov indi öz bağında və ya evində rahat oturub, şəhərdən çıxmır, ya da çıxır? Necədir onun durumu hazırda? 

  • Biz bilmirik ki, Eldar Mahmudov daha hansı xəyanətlərə imza atıb.

H.Herisçi: 

– Siz inanırsız ki, o, hazırda sağdır və Azərbaycandadır? Mənim ilk gündən şübhəm var buna. Şəxsi duyumla deyirəm bunu, əlimdə hər hansı fakt, dəlil yoxdur. 

  • Mənim əlimdə hansısa fakt yoxdursa, şəxsi hipotezlə necə çıxış edə bilərəm? Mən Eldar Mahmudovun nə ölüsünü, nə dirisini görmüşəm. Heç kim görməyib. Amma mən düşünürəm ki, sağdır. Onun yaxın çevrəsində adamlar var, onlar vasitəsilə öyrənmişəm ki, sağdır, sadəcə, ev dustağıdır.

S.Telmanqızı: 

– Hazırda Akif Çovdarovun məhkəməsi gedir. İzləyirsizmi? Onun məhkəməsindən MTN işi adına nə gözləyirsiz? Necə düşünürsüz, A.Çovdarov hansısa formada ifşaedici fiqur ola biləcəkmi? Yoxsa Gülər Əhmədova, Hacı Məmmədov kimi sona qədər dövlətə öz sədaqətini nümayiş etdirəcək? 

  • İzləyirəm təbii ki. Bizim müxbir hətta zalda oturub, prosesləri izləyir. Onsuz da Akif Çovdarova mənim hörmətim yox idi. Amma düşünürəm ki, Hacı Məmmədov Akif Çovdarovdan daha ləyaqətli adamdır. Çünki kişi eşafota da alnı dik, ləyaqətlə getməli, son ana qədər ləyaqətini qorumalıdır.

S.Telmanqızı: 

– Siz onun aclıq etməsinə görə bu qənaətə gəlmisiz? 

  • Yox, aclığa görə deyil. Siz onun replikalarına, özünü müdafiəsinə baxın. Hacı Məmmədov müəyyən mənada alicənab idi…

S.Telmanqızı: 

– (Gülərək) Eynulla bəy, Hacı Məmmədov qadın qaçırırdı, hansı alicənablıqdan danışırıq?

  • Yox e, mən onu demirəm. Ləyaqət kodeksindən danışıram. Bu adam kislorod balonu ilə məhkəməyə gəlir, skamyaya uzanır. Sən generalsan e… Heç olmasa mundirinə hörmət elə.
“Mən tarixdə belə presedent görməmişəm ki, xüsusi xidmət orqanlarının rəhbəri həbsxanaya girsin”

S.Telmanqızı: 

– Belə çıxır ki, bərkə-boşa dözümləri yoxdur. 

  • Razısız mənimlə? Adam məhkəmədə skamyasında uzanır. Piri babanın nağıllarından sitatlar gətirir. Mən Hacı Məmmədovun proseslərini də izləmişəm. Özünü aparması, vücudu, davranışı, sözləri. Heç vaxt heç kimdən nəsə xahiş etmədi. Nə soruşurdularsa deyirdi ki, mən eləmişəm, düz eləmişəm, filan şeyə görə etmişəm.

S.Telmanqızı: 

– Bəs Akif Çovdarov nə edəcək, sizcə? Sınacaq sonda? 

  • O, artıq sınıb. Akif Çovdarov hakimin  qarşısında diz çöküb uşaq kimi ağlayır.

R.Arifoğlu: 

– Niyə heç Eldar Mahmudovun adını çəkmir? O xətt açıq görünür. 

  • Axı Akif Çovdarov Eldar Mahmudovun sanki sağ əlidir.

R.Arifoğlu: 

– Həm də bir xilas kəməri kimimi baxır? 

  • Düşünmürəm. O bilir ki, oyun bitib. Bu, ona nə verəcək ki? Heç nə. Sadəcə, bu gün Akif Çovdarov özünü xilas etmək istəyir. Xilası da bilirsiz nədə görür? Ölmək istəmir. Bilir ki, 15 il həbs onuncun ölüm hökmüdür.

S.Telmanqızı: 

– Necə düşünürsüz, hələ də hansısa şansı qalıbmı? Bu manevrlər ona hakimiyyətin rəhmini qazanmağa imkan verəcək? 

  • İnanmıram. Bu adam təpədən dırnağa qədər cinayətkardır. O, azadlığa çıxsa, daha bu haradan ədalət mühakiməsi oldu? 200-dən artıq epizod var. Necə xilas olunacaq? Akif Çovdarov çox qorxaq adamdır. Mən bunu onunla görüşdə də hiss etdim… Sentyabrın 25-də mənim ad günüm idi. Təcridxanada idik. Məni çağırdılar. Girdim rəisin otağına. Gördüm ki, böyük masa açılıb. Akif Çovdarov da içəridə. Dedi ki, bu masa sənin üçün açılıb. Mən də artıq 6-cı ay idi ki, borşla qreçka yeyirdim.

Sovqat da buraxmırdılar. Gördüm ki, masanın ortasında da bir viski butulkası. Dedim ki, bu viskini içə bilərəm? Ani olaraq düşündüm ki, bunu zəhərləyib. Açığı, ölmək istəyirdim. Mənəvi cəhətdən çox yorulmuşdum. Təsəvvür edin ki, aylardır həbsdəyəm və məndən Elmar Hüseynovla bağlı saxta ifadə verməyimi tələb edirlər, bu tərəfdən də ağır ittihamlar. Düşündüm ki, mənim qismətimdir, içəcəm bu viskini… Ölərəm ölərəm, qalaram qalaram. Götürdüm o viskini başıma çəkdim. Qoydum masanın üstünə. Akif Çovdarovla bir-birimizin gözünün içinə baxdıq…

S.Telmanqızı: 

– Bu ad günü qonaqlığının, jestin səbəbi, məqsədi nə idi? 

  • Məqsəd körpü yaratmaq. Çünki mən artıq ittihamlarımı demişdim.

S.Telmanqızı: 

– Sizinlə bağlı sonuncu cəhdi bu oldu? 

  • Bəli, sonuncu cəhdlərdən biri idi. Orda çox maraqlı epizod oldu. Biz söhbət edəndə nəsə həbsxanadan söz düşdü. Dedi ki, Allah göstərməsin, Allah göstərməsin… Qulaqlarını çəkdi, “kış kış” elədi. O məlum jest… Guya mənə psixoloji təsir etmək üçün idi. Həbsxananın necə ağır olduğunu mənə yeritmək üçün etdi. Akif Çovdarov həbsə girəndə nəyə görəsə bu mənzərə gözümün qabağına gəldi. Çox qorxaq adam idi. Cinayətkarlar hər zaman qorxurlar. İnsan nə zaman adam öldürür? Qorxaqlıqdan. Çox nadan, savadsız adam olub. O, ömründə kitab oxumayıb…

H.Herisçi: 

– Akif Çovdarov Rostovda oxuyub. Mən özüm Rusiyanın ali məktəblərində oxumuş biri olaraq deyirəm ki, orda təhsil almaq, diplom almaq heç də asan məsələ deyil. Necə oxuyub onda? 

  • Şalban alverçisi olub bu adam. Nadan idi. Bəzən görürəm ki, Moskva Dövlət Universitetini bitirən adam rus dilində danışa, yaza bilmir. Sual verirəm ki, siz necə dili bilmədən bu universiteti bitirmisiz? Mənə sonradan müəllimlər bunu izah ediblər ki, onlara milli azlıq kimi hörmət edirdilər. Sovet dönəmində bu prinsip idi. Hər respublikaya kvota vardı. Sovetlərdə bir nümayişkaranə beynəlmiləlçilik əhvalı, sovet ölkələrindən olan bütün xalqların təmsil olunduğu ali məktəb modeli yaratmaq var idi.

R.Arifoğlu: 

– Eynulla bəy, məlumdur ki, Siz sol təmayüllü ideologiyalara simpatiya bəsləyirsiz.  Amma dünyadakı tendensiya hazırda tamam başqadır – sağçı, mühafizəkar, milliyyətçi ideologiyalar və onları təmsil edənlər dünyada hakimiyyətə gəlirlər. İngiltərədə, Amerikada, Fransada gedən prosesləri izləyirsiz yəqin. Dünya sanki dəlixanaya dönüb. Bu günə qədər bizə aşılanan, Qərbdən gələn dəyərlərin tam tərsini təmsil edən reaksioner siyasi qüvvələri –  islamafobları, rasistləri Qərb insanı dəstəkləyir və iqtidar edir. 

  • Mən bunu 3-4 il öncə yazanda deyirdilər ki, Eynulla utanmır, Qərbə qarşı cəbhə açır…

R.Arifoğlu: 

– Məsələn, Amerika Trampa səs verdi, prezident etdi. Onun seçki şüarları nə idi? Antimüsəlman, antiimmiqrant… Bütün məlum ABŞ dəyərlərinin hamısının “antitezisi”! Hazırda klassik ABŞ dəyərlərinə Azərbaycanda daha çox səs verərdilər; mən düşünürəm ki,  bizim bəzi vətəndaşlarımız daha çox amerikalıdır, nəinki amerikalılar… 

  • Bu, siyasi böhrandır. Cəmiyyətdə siyasi böhran nə zaman yaranır? Sistemin böhranı dəyərlər böhranından başlanır. Dəyərlər böhranından sonra iqtisadi böhran başlayır. Qərb cəmiyyətində dəyərlər böhranı 2000-ci illərin əvvəllərindən başlandı. O zaman artıq liberalizmdən imtina və neoimperialist tendensiyaların güclənməsi, dünya bazarları uğrunda böyük savaş, kalonizasiya… Artıq Qərb liberalizmindən imtina etməyə başlamışdı…

H.Herisçi: 

– Buş doktrinasından öncə…?

  • Hətta Buş doktrinasından öncə. Sonra 2008-ci ildə dəyərlər böhranı iqtisadi böhranına keçdi. İqtisadi böhran nədən başladı? Bütün inşaat piramidaları çökdü. Sabun köpükləri partladı. Əslində bu, yalan köpükləri üzərində, vəhşi kapitalist fəlsəfəsinin təntənəsi olaraq yaranmış mənzərə idi.

R.Arifoğlu: 

– Amma yenə də bir solçu olaraq dəyərləndirmə edirsiz… 

  • Xeyr, Rauf bəy, bunu Qərb özü belə dəyərləndirir. İqtisadi böhrandan sonra siyasi böhran başladı. Mənimçün Qərbdə siyasi böhran nə zaman başladı? Mən həbsdə idim və onu oxuyanda dəhşətə gəldim: Ştutqartda 30 minə yaxın insanı vəhşicəsinə dağıtdılar. Onlar bilirsiz hansı şüarlarla küçələrə çıxmışdılar? Orda bir yerli park var idi. Onu söküb yerində dəmiryol parkı tikirdilər. İnsanlar da buna etiraz edirdilər…

H.Herisçi: 

– Türkiyədəki “Gezi” olayları kimi… 

  • Bəli, eynən. “Gezi”dən 3 il öncə. Bunları qoca, yaşlı, uşaq demədən vəhşicəsinə döydülər. 900-ə yaxın adam xəstəxanalara çatdırıldı. Bu, mənə dəhşətli dərəcədə pis təsir etdi. Mən düşündüm ki, bu liberalizm hara gedir? Sonradan bu, Avropada adət halını aldı. Mən bunu öz gözümlə görürdüm. Almaniyada, gözümün qabağında polislər mitinqləri necə dağıdırdılar. Çox adam deyirdi ki, Eynulla hakimiyyətin sifarişi ilə Qərbi pisləyir…

S.Telmanqızı: 

– Bir müddət sizin o yazılar serial olaraq gedirdi… 

  • Bu bilirsiz nə idi? Mən həbsdən sonra uzun müddət Avropanı gəzdim, çox gəzdim…

S.Telmanqızı: 

– (Müdaxilə edir) Bağışlayın, öz təşəbbüsünüzlə edirdiz bunu? O səfəri, o reportajları… 

  • Əlbəttə. Mənim gözümün qabağında Frankfurt manifestasiyasını… Sanki 2003-cü ilin Bakısı idi… İnsanların sifətinə qaz balonlarını püskürdürdülər. 2000 adam həbs etdilər, qanunsuz mitinqdə iştirak etdiyinə görə onlara cinayət işi açdılar. Mən onların hüquq müdafiəçiləri ilə görüşdüm. Mənim Almaniya haqqında bir filmim var.  Dedim axı,  niyə sizin qəzetləriniz bu boyda hadisə haqda yazmır, televiziyalarınız bunları göstərmir? Beynəlxalq insan haqları liqasının prezidenti Henri Müller idi görüşdüyüm. Dedi, bəli, siz bizim televiziyalarda Honqkonqda mitinqlərin dağıdılmasını, Azərbaycanda insan haqlarının pozulmasını görə bilərsiz. Amma heç zaman Almaniyada insan haqlarının pozulmasını görə bilməyəcəksiz. Əslində bilirsiz necədir?

Marks deyirdi ki, tarix spiraldır. Ən yeni siyasi tarixi biz dörd mərhələyə bölə bilərik. İnkişaf, inkişafın pik nöqtəsinə çatması, kataklizm, müharibə, müharibədən sonra dəyərlərin qorunması, dəyərlərdən imtina, iqtisadi böhran, sonra siyasi böhran və yenidən sağçıların hakimiyyətə gəlməsi… Bu,  əslində marksizmdir və biz bunu 18-ci əsrin sonundan, böyük Fransa inqilabından görə-görə, sezə-sezə gəlirik. Bu, təkrar olunmaqdadır və bir tsikldir. İndi Amerikada sağçılar hakimiyyətə gəlib. Bu proses davam edəcək. 30-cu illər yadınızda deyil? Hitler Almaniyada, Mussolini İtaliyada, Franko İspaniyada hakimiyyətə gəldi…

R.Arifoğlu: 

“30-cu illər yadınızda deyil? Hitler Almaniyada, Mussolini İtaliyada, Franko İspaniyada hakimiyyətə gəldi…”

– Bu, qlobal bir proses idi… 

  • Bəli, tamamilə doğrudur. Bu prosesi nə dayandırdı? Böyük kataklizm. Hazırda da dünya böyük kataklizmə, savaşa doğru gedir. Məncə, bu prosesi də bir kataklizm, savaş dayandıracaq.

H.Herisçi:

– Siz dediz ki, yeni sağçılar hakimiyyətə gəlir. Bunların müəllimi var – Leo Ştraos. Çikaqo Konservativ Məktəbinin banisi. Ağ Evin kadrlarının böyük qismi onlardandır, hərbi nazirlik də, kəşfiyyatçılar da onlardan ibarətdir. Onlar deyirlər ki, cəmiyyətə informasiya yox, dezinformasiya  ötürülməlidir. İnformasiya ali elitanın, dezinformasiya xalqındır.

R.Arifoğlu: 

– Belə olan halda Qərb paytaxtlarından illərdir bizə gələn ideologiya və onun əsasında bizim siyasi strukturlaşmamızın, siyasi sistemimizin taleyi necə olacaq? 

  • Bu sistem iflasa uğradı. Sosializm də həmçinin. Dünyada bütün ideologiyalar iflasa uğrayıb. Bu, artıq kütləvi prosesdir. Liberalizm də, avrosentrizm də bitib. Avrosentrizm də liberal mərkəzçiliyin əsasında yaradılıb. Avropada inkişaf elə bir həddə çatmışdı ki, liberalizmlə sosializm yaxınlaşmışdı. Bu, artıq yeni bir cərəyanın – liberal-sosializmin ortaya çıxmasına səbəb olmuşdu. Ona görə də Fukuyama yazmışdı ki, “bu, tarixin sonudur, sonra nə?” Sonra dağılma prosesi…

R.Arifoğlu: 

– Bu məqamda Azərbaycan oxucusu sizi də, Həmid bəyin sizinlə nəzəri debatını oxuyur və sual verir: bəs bu qarğaşada, dəlixanada bizi, Azərbaycanı nə gözləyir? İdeoloji şəkil dəyişimi prosesi Azərbaycanı necə tətikləyəcək? Burda da hakimiyyət dəyişikliyi, elitaların dəyişikliyi, idarəetmə konseptinin dəyişimi zəruridirmi? Bizdə də həmin “məktəbin” məzunları varmı ki, onlar bunu həyata keçirsinlər. 

  • Çox mürəkkəb siyasi situasiyanı müşahidə edirik. Rusiya imperiyası dirçəlir…

R.Arifoğlunun replikası: 

– Dünyanın hər yerindən rus bombalarının səsi gəlir… 

  • …4-5 il bundan qabaq,  Medvedyevin prezidentliyi dönəmində Rusiya qoşunlarının Suriyaya girməsi mwmkwn ola bilərdi? Medvedyev hakimiyyətdən gedəndən sonra Saxarov meydanında milyonlarla insan etirazlar edirdi və artıq Putinin hakimiyyətdə qalıb-qalmaması sual altında idi. Bütün bunlar 4-5 il öncə baş vermişdi. 5 ilə tarix dəyişdi və hazırda da dəyişməkdədir.

R.Arifoğlu: 

– Təklif edirəm, bütün bunları xatırladarkən Azərbaycanı da təhlil edək. Yoxsa oxucu bunu niyə oxusun? 

  • Bəli, Azərbaycana gətirib çıxarırıq. Demək, bir tərəfdən Rusiya imperiyası, o biri tərəfdən Türkiyə dirçəlir,  İran 2500 illik axinemitlərdən bu yana dövlətçilik, imperiya ənənələrinə qayıdır. Bizi nə gözləyir? Ona görə də təxminən 3-4 il qabaq yazır və deyirdim ki, bu gün Azərbaycan üçün ən optimal üsul-idarə gözümüzün qabağında formalaşıb. Bu modelin banisi də İlham Əliyevdir. Bəzən suallar veririk ki, niyə ölkədə kadr dəyişikliyi həyata keçirilmir? Niyə filan nazir dəyişmədi?

Niyə kadr dəyişikliyi məsələsinə belə mühafizəkar münasibət var? Çünki prioritet sistemli stabillikdir. Yəni Azərbaycan o qədər mürəkkəb bir vəziyyətdədir ki… Baxın, Eldar Mahmudov və Əli Abbasov məsələsi ölkəni necə titrətdi. Mən düşünürəm ki, çox düzgün, dünya siyasi konyukturuna hesablanmış siyasət həyata keçirilir. Prezident İlham Əliyev niyə əleyhdarlarını, siyasi rəqiblərini məğlub etdi? Cəmil Həsənli hələ də onu anlamayıb…

Yazdı ki, biz dünya mətbuatını oxumasaq da… Mən ona yazdım ki, siz dünyada gedən proseslərdən bixəbərsiz. Dünya liberalizmdən imtina edir. “Brexit”dən sonra Əli Kərimli tərəfdarları Avropa İttifaqının bayraqları ilə meydana çıxdılar. Bu, o deməkdir ki, bu insanlar dünyada gedən prosesləri təhlil edə bilmirlər.

“Qərb cəmiyyətində dəyərlər böhranı 2000-ci illərin əvvəllərindən başlandı”

R.Arifoğlu: 

– Hansı bayrağı qaldıraydılar? Bir siyasi texnoloq kimi məsləhət, təklif verin, elə buradaca… 

  • Fürsət idi… Manatın bayrağı ilə çıxmalıydılar. Amma bunlar Avropa İttifaqının bayrağı ilə çıxdılar. Hazırda Avropa İttifaqının başağrısı Böyük Britaniyadır, Azərbaycan deyil. Ona görə də bütün bu proseslər ekspert heyəti tərəfindən təhlil olunur…

R.Arifoğlu (müdaxilə): 

– Yəni o dəyişimdə və Azərbaycandakı təlatümlərin içində bir düşərgəni nəzərə almayaq? 

  • Yox, mən ona görə deyirəm ki, İlham Əliyev optimal bir üsul  – idarəetmə yaratdı.

R.Arifoğlu: 

– Amma bu millətin bir parçası da onun müxalifətidir. Onları da idarə etmək lazımdır.  

  • Razıyam… Amma bu mərhələdə ən böyük məqsəd və hədəf Azərbaycan dövlətini maksimal dərəcədə qorumaqdır. Əslində İlham Əliyev müstəqil Azərbaycan dövlətini qoruyub – bu vəzifəsinin öhdəsindən layiqincə gəlib. Bizim bu yaxınlarda Amerika səfirliyinin işçiləri ilə dialoqumuz oldu. Mən onlara dedim ki, postsovet məkanında ən müstəqil dövlət Azərbaycandır. Mənə Azərbaycandan daha müstəqil dövlət göstərin. Ermənistanmı, hətta Gürcüstanmı? Yəni bizdə qərarlar Bakıda qəbul olunur. Ola bilər ki, Brüsseldən, İrandan, İstanbuldan hansısa tövsiyələr edilsin, amma son qərar Bakıda qəbul olunur…

R.Arifoğlu: 

– Yeri gəlmişkən, İlham Əliyev iqtidarı hansı paytaxtlara daha yaxındır, sizcə? 

  • Ən gözəl cavabı elə dünən (21 noyabrda-müəl.) Lilit Gevorkyan – London Siyasi Təhlil Mərkəzinin nümayəndəsi verdi ki, niyə İlham Əliyev Sərkisyanı məğlub etdi? Söhbət diplomatik və eyni zamanda hərbi məğlubiyyətdən gedir; apreldəki dördgünlük müharibə böyük uğur idi… L.Gevorkyan bunun səbəbini belə yazıb ki, çünki Azərbaycan Ermənistandan fərqli olaraq yenidən çoxşaxəli,  vektorlu xarici siyasətini həyata keçirməkdədir. Azərbaycan hamıya yaxındır və hamıya eyni dərəcədə uzaqdır. Bu, bir uğur konsepsiyasıdır. Əslində bunun əsası Heydər Əliyevin dövründə qoyulub. Amma İlham Əliyevin dövründə bu konsepsiya daha da mükəmməlləşdi. Çünki İranla problemlər yaşanırdı. Amma indi dünya da fərqlidir.
“Postsovet məkanında ən müstəqil dövlət Azərbaycandır, bütün qərarlar Bakıda qəbul olunur”

R.Arifoğlu: 

  • Eynulla bəy, dünyanın demokratiya paytaxtlarında, o cümlədən bizim əvvəl nümunə kimi baxdığımız Türkiyədə, ABŞ-da hakimiyyətə gələnlər və ya hakimiyyətini yeniləyənlər ciddi məhdudiyyətlərə gedirlər, cəmiyyətlər, azadlıqlar daha da sıxışdırılır. Azərbaycanı da azadlıqların məhdudlaşdırıldığı ölkə kimi qeyd edirlər, amma durum, məsələn, Türkiyədəki kimi deyil. Orda çevriliş cəhdindən sonra 100-dən çox jurnalist həbsdədir, çoxlu qəzetlər, televiziyalar bağlanıb… Bu cür tendensiyalar Azərbaycanda azadlıqları məhdudlaşdırmaq istəyənləri daha da həvəsləndirə bilərmi? Biz Trampın mediaya qarşı tövründən nə cür ruhlanacağıq? Bizi nə gözləyir? Bu sual çörəyi demokratiyadan çıxan və manata görə də qazancları devalvasiyaya uğrayan insanları daha çox maraqlandırır…

Söhbəti qələmə aldı: Sevinc TELMANQIZI

Print Friendly, PDF & Email